| |
|---|
|
Golygfa 2. Ar dop yr adeilad. Mae dyn ifanc yn sefyll yn simsan ar ymyl y to. Mae botel fodca yn ei law.
|
Lei
|
Shit!
|
Ping
|
Be?
|
Lei
|
Ma rywun yma.
|
Ping
|
Pwy?
|
Lei
|
Dwn 'im! Bachgen o ryw fath.
|
|
Ping yn edrych at gyfeiriad y bachgen.
|
Ping
|
Be wnawn ni?
|
Lei
|
Ga'd mi feddwl am eiliad.
|
Ping
|
Be am i ni guddiad yma ag aros i weld os mae'n gadael.
|
Lei
|
Cau hi!
|
Ping
|
Neu fedra ni snecio heibio fel y Teithiwr Hudol.
|
|
Mae nhw'n cuddiad yn y cysgod. Mae'r bachgen yn canu yn isel.
|
Lei
|
Dyna'r ffenest.
|
Ping
|
Lle?
|
Lei
|
Ochr arall i'r ffŵl 'ma.
|
Ping
|
Blydi briliant.
|
Lei
|
Faint gymrith i ti bigo'r clo yna?
|
Ping
|
Mae'n dibynnu.
|
Lei
|
Achos gymrith yr un dwytha blydi oes mul.
|
Ping
|
Dio'm yn bosib rhuthro'r pethe 'ma.
|
Lei
|
Wnai distractio fo, tra ti'n pigo'r clo.
|
Ping
|
Be, ti ffansi sgwrs bach efo fo?
|
Lei
|
Sut arall?
|
Ping
|
A wedyn fydd o'n gweld ein gwynebau ni a mynd i'r heddlu.
|
Lei
|
Cau dy drap am y blydi heddlu! Awn ni i siarad efo'r hogyn. Gweld be' mae'n da 'ma.
|
Ping
|
Ocê. Merched gynta.
|
|
Lei yn cerdded at y bachgen. Ping yn dilyn.
|
Lei
|
Iawn boi?
|
|
Dydi'r bachgen ddim yn ymateb.
|
Ping
|
Noswaith hyfryd.
|
Lei
|
Ga'd y siarad i mi. 'Chydig yn hwyr i fod fyny famma, yn y twllwch, ar ben dy hun.
|
|
Mae'r bachgen yn edrych ar Lei.
|
Shujun
|
Pam 'da chi yma felly?
|
Lei
|
Security guards newydd 'da'ni. Neud y rownds, checkio pethe.
|
Shujun
|
Iawn.
|
Lei
|
Felly, os ti'm yn meindio, dwi'n meddwl bod o'n amser i ti fynd adre.
|
Ping
|
Fydd dy deulu yn poeni amdana ti.
|
Lei
|
Dio'm yn sâff fyny famma.
|
Shujun
|
Fy nho i ydi hwn. Allai eistedd yma os dwisio.
|
|
Lei a Ping yn edrych ar ei gilydd.
|
Lei
|
Ti'n byw yma 'ta?
|
Shujun
|
Yndw.
|
Lei
|
O. Neis. Pa lawr?
|
Shujun
|
Pam? Tisio fi arwyddo rywbeth?
|
Lei
|
Just wyndro dwi.
|
Shujun
|
Dwi'm yn leidr, os dyna 'dachi'n feddwl.
|
Lei
|
Na, na, argol - na! Poeni amdanat ti yda ni. Os fase ti'n disgyn, fydda ni mewn uffar o drwbwl.
|
Shujun
|
Wel diolch am eich consyrn, ond dwi'n fine.
|
Ping
|
Jyst yn gwneud ein job.
|
Shujun
|
Cariwch ymlaen. Plis. Dwi'm yn stopio chi.
|
|
Neb yn symud.
|
Ping
|
Be ti'n yfed?
|
|
Mae'r bachgen yn dangos y botel.
|
Ping
|
Fawr o hwyl yfed ar ben dy hun.
|
Shujun
|
Tisio peth?
|
Ping
|
Na, diolch.
|
|
Lei yn rhoi signal i Ping fod yn ddistaw. Ping yn ei anwybyddu.
|
Ping
|
Ti'n gwbo' be dwi'n feddwl? Dwi'n meddwl na fedr person sy'n yfed ar ben ei hun fod yn berson hapus.
|
Shujun
|
Ydi hynna'n ffaith?
|
Ping
|
Dwi'n meddwl bod person sy'n yfed fel'na yn yfed tristwch.
|
Shujun
|
Diddorol iawn.
|
Ping
|
Ond mae 'na un peth fedrai'm dalld.
|
Shujun
|
A be 'di hynna?
|
Ping
|
Pam ar y ddaear mae bachgen ifanc fel ti yn drist? Eh? Sbia ar lle ti'n byw. Ti'n hogyn digon golygus. Ma' siwr bod gyn ti ffrindiau.
|
Shujun
|
Di'r pethau yna'n golygu dim.
|
Ping
|
Fedra di roi nhw i fi felly. Os 'swn i'n ti, 'swni'n dathlu efo'r botel fodca 'na, yn lle pwdu.
|
Shujun
|
'Sgyn ti'm clem.
|
|
Ping yn agosàu.
|
Ping
|
Eglura i mi 'ta. Be sy'n bod? Ffeit efo dy gariad? Di hi'm yn ffansio ti bellach? Ti'n gwbo' be ddylsa ti neud? Dos i dy wely am dridiau, binge-ia ar Netflix, a cria mewn i dy glustog. Ma puncho'r clustog yn help weithiau hefyd. Gwely am dridiau, Netflix, puncho clustog. Trystia fi.
|
Shujun
|
Dwi heb gael ffeit efo nghariad. Sgynnai'm cariad.
|
Ping
|
A! Dyna di'r broblem felly.
|
Shujun
|
Naci. Dwi'm isio siarad am y peth. Ffwcia o'ma.
|
Lei
|
Nefi bliw! 'S'nam angen rhegi. 'Dani'n trio bod yn gyfeillgar.
|
Ping
|
Warth i ti ddeutha ni. Sgynna ni'm clem pwy wyt ti, dani'm yn mynd i ddeutha dy ffrindiau. A ti byth yn gwbo', ella fydd o'n bosib i ni helpio chdi. Rhoi cyngor i rywun mewn cyfyng gyngor.
|
Lei
|
Be ti'n trio - cynghanedd?
|
|
Mae'r bachgen yn cymryd swig o'r botel.
|
Shujun
|
Oes rywun erioed 'di dy siomi?
|
Ping
|
Ein bos. Wnaeth o addo pay rise i ni flwyddyn diwethaf. 'Da ni dal i ddisgwyl.
|
Shujun
|
Dim fel'na. Oes na rywun ti'n rili edmygu, a wedyn ti'n darganfod bod nhw da i ddim?
|
Ping
|
Um... dwi'n trio meddwl... oes. Oedd 'na ferch yn ysgol bach, yn eistedd ar y run un desg a fi. Odd hi'n gret. Clyfar. Hardd.
|
Shujun
|
Be wnaeth hi?
|
Ping
|
Un diwrnod, wnaeth yr athrawes adael y stafell ddosbarth, oni'n chwarae'n wirion efo rywun ar y ddesg gyferbyn. Pawb yn wneud run peth, pawb yn siarad pan odda ni fod yn astudio mewn distawrwydd - yn cynnwys y ferch 'ma ar y run desg a fi. Pan ddoth Miss yn ôl mi ofynnodd pwy dorrodd y rheolau? Mi gododd y ferch 'ma ei llaw. 'Plis Miss, mi oedd o'n torri'r rheolau'. Dobio fi fewn. Torri 'nghalon.
|
|
Mae'r bachgen yn estyn y botel fodca i Ping.
|
Shujun
|
Be oedd y gosb?
|
Ping
|
Rhedeg 3 lap o'r trac traws gwlad, trwy'r blydi slwj, wedyn odd raid i mi helpu'r adeiladwyr gario brics trwy'r pnawn.
|
Shujun
|
Be wnes di iddi, yr hogan?
|
Ping
|
Be ti'n feddwl?
|
Shujun
|
I dalu hi'n nôl.
|
Ping
|
Dim byd. Be fedrwn i wneud? Hogan fach odd hi, hogan delia'n byd.
|
|
Ping yn yfed.
|
Ping
|
Pwy sy'n creu dy broblem di?
|
Shujun
|
Rywun ddylsa wybod yn well.
|
Ping
|
Dachi'n agos?
|
Shujun
|
Agos iawn. Neu, mi odda ni.
|
Ping
|
Odd y person 'ma'n gas efo ti?
|
Shujun
|
Dim efo fi. Efo bobl eraill.
|
|
Lei yn torri ar draws.
|
Lei
|
Torra pob cysylltiad, well i ti gael gwared ohona nhw. Os mae nhw'n wael i bobl eraill rŵan, fydden nhw'n wael i ti yn y dyfodol agos.
|
Shujun
|
Dio'm mor syml a hynny.
|
|
Mae'r bachgen ifanc yn dwyn y botel yn ôl ac yn yfed.
|
Lei
|
Sblitia fyny efo hi. Sgynnai'm amser ar gyfer pobl dau wynebog. Neis a hapus un munud, fel y diafol y nesa. Odd gynna i gariad. Oddan ni wedi dyweddio. Dros pen a chlustiau mewn cariad efo hi. Un diwrnod ma'i'n troi rownd a deud bod hi'm yn ffansio fi bellach, bod hi'n fy ngadael i am rywun arall.
|
Shujun
|
Rywun cyfoethog?
|
Lei
|
Rhedeg ryw fusnes, busnes bach ond yn gwneud dwbwl fy nghyflog. Well ganddi fod yn feistres iddo fo na gwraig i mi.
|
|
Mae'r bachgen yn gwthio'r potel i law Lei, sy'n cymryd swig.
|
Shujun
|
Felly adawodd hi ti am arian?
|
Lei
|
Yn union! Dyna mae popeth yn arwain at yn diwedd.
|
Shujun
|
Dim popeth.
|
Lei
|
Na? Enwa un problem sydd ddim am bres.
|
Shujun
|
Wel...bariaeth, celwyddau, gwagedd...'mond rhan o'r broblem ydi arian.
|
Lei
|
Dyna mae pawb isio. Dyna sy'n ein cymell ni i wneud pethe drwg.
|
Shujun
|
Felly dim arian ar ben ei hun ydi'r problem. Y broblem ydi'r ffaith bod ni isio arian. Mae pob problem yn deillio o awydd, chwant - 'dwi isio'.
|
|
Maent yn pasio'r botel rhygthyn. Mae'r bachgen yn cario 'mlaen.
|
Shujun
|
Mae'r broblem yma, dymuno pethe, wedi bodoli ers byth bythoedd. Pam mae'r mynachod Bwdhaidd yn datgysylltu eu hunain o bleserau daearol? Pam mae Cristnogion yn sôn am y saith pechod marwol? R'un peth 'dio. Yr unig wahaniaeth ydi bod y mynachod Bwdhaidd yn trio gwneud i bobl weld gwacter eu dymuniadau. Mae'r Cristnogion yn trio rhoi braw i ni efo'u straeon o ddamnedigaeth ag uffern ffyrnig. Mae gan Confucius syniad gwahanol. Gan dderbyn y bydden ni o hyd yn dymuno pethe, roedd o jyst isio ni anelu amdanyn nhw mewn ffyrdd cyfiawn.
|
Ping
|
Um, ga'i just ddeud, sgynnai'm clem be ti'n sôn am.
|
Shujun
|
Wrth gwrs bod gyn ti. Wnaeth ei ddyweddi adael o am ddyn mwy cyfoethog reit?
|
Ping
|
Reit.
|
Shujun
|
Achos roedd hi'n dymuno bywoliaeth mwy cyfforddus.
|
Lei
|
Yr hen ast!
|
Shujun
|
Ddaru dy ffrind yn 'rysgol reportio ti i'r athrawes achos oedd hi isio—be?
|
Ping
|
Dwn i'm.
|
Shujun
|
Isio'r athrawes licio hi. Roedd hi'n dymuno ei sylw.
|
Ping
|
Ella.
|
Shujun
|
Dydi pawb ddim isio pres. Mae rhai yn gaeth i sylw. Eraill, llawer, isio concro'r byd. Dim am gyfoeth y byd ond am gydnabyddiaeth y byd. Efallai dio ddim i wneud â pres, yn hytrach mae i'w wneud â chanmoliaeth, sylw, cariad ac edmygedd - dymuniadau pobl. Dyna pam mae nhw'n gwneud camgymeriadau.
|
Lei
|
Wyt ti'n stiwdent o gwbwl?
|
Shujun
|
Trydydd flwyddyn. Athroniaeth.
|
Lei
|
Oni'n meddwl.
|
|
Mae'r bachgen yn mynd yn hapusach ac yn gynhyrfus.
|
Shujun
|
Ocê. Ocê. Dyma gyfyng gyngor moesol i ti.
|
Lei
|
O Dduw.
|
|
Lei yn cymryd swig o'r botel a'n pasio fo i Ping.
|
Shujun
|
Cogia bod gyn ti gariad sy'n artist, iawn?
|
Ping
|
Ydi dy gariad di'n artist?
|
Shujun
|
Cogia bod gyn ti gariad sy'n artist.
|
Ping
|
Sgynnai ddim though.
|
Shujun
|
Cogio, ddudis i. Cwestiwn damcaniaethol ydi hwn, iawn?
|
Ping
|
Dam can - be? Dam can thank you mam! Ocê. Cogio, cogio. Sori. Dos yn dy flaen.
|
Shujun
|
Cau dy lygaid. Dychymga bod gyn ti gariad.
|
Ping
|
Dwi'n dychmygu!
|
Shujun
|
A dychmyga bod hi'n actores.
|
Ping
|
Ie. Dwi'n gallu gweld hi rŵan.
|
Shujun
|
A dychmyga bod hi'n hynod dalentog a bod hi'n gweithio'n galetach na neb.
|
Ping
|
Wrth gwrs.
|
Shujun
|
Ond dydi hi ddim isio enwogrwydd neu unrhyw fath o ffortiwn.
|
Ping
|
'Di ddim?
|
Shujun
|
Na. Cwbwl ma'i isio ydi bobl i werthfawrogi ei gwaith.
|
Ping
|
Reit.
|
Shujun
|
Ond 'di ddim yn medru ffindio gwaith. Mae hi'n trepsio i'r holl glyweliadau 'ma. Ond does neb yn ei chastio hi achos does neb yn sylweddoli faint mor dalentog ydi hi.
|
Ping
|
Dydyn nhw'm yn gwbo be mae nhw'n golli.
|
Shujun
|
Cwbwl ma'i angen ydi un brêc. Un siawms i ddod ymlaen yn y byd. Be ddylsa hi wneud?
|
|
Ping yn meddwl. Lei yn neidio mewn.
|
Lei
|
Hawdd. Shagio'r cyfarwyddwr.
|
Ping
|
Na!
|
Lei
|
Mae pawb arall yn gwneud o. Mae 'na lot o actorion da allan yno. Dyna 'di'r unig ffordd i gael hwb i fyny.
|
Shujun
|
Be os mai hi ydi dy gariad di?
|
Lei
|
Fy nghariad i?
|
Shujun
|
Ie. A ti'n ffindio allan. Be faset ti'n gwneud?
|
Lei
|
Rhoi clustan iddi a fydda ni 'di torri fyny.
|
Shujun
|
Ond os ti'n rili caru hi?
|
Lei
|
Os fysa hi'n rili caru fi fase hi'm yn gwneud hynna! Ac eniwe dydi cariad ddim yn golygu goddef anffyddlondeb.
|
Shujun
|
Ond os fase ti'n caru hi go iawn, faset ti'm isio marw?
|
Lei
|
Marw? Fi? As if.
|
Shujun
|
Os wyt ti 'di dotio efo hi. Roeddet ti dan yr argraff bod hi mor bur fase hi 'rioed yn gwneud y fath beth.
|
Lei
|
Wel faswn i'n foi twp iawn i gredu hynna.
|
Shujun
|
Ond fysa ti'm yn teimlo bod dy fywyd yn disgyn i ddarnau? Fysa ti'm iso'r cyfan ddod i ben?
|
Ping
|
Dio'm werth o mêt. Coelia fi. Dos i dy wely ar ôl byta llond oergell o fwyd, a cysga am dridiau. Fyddi di 'di anghofio'r cwbwl lot.
|
Shujun
|
Dwi'n meddwl os mae rhywun yn gadael chi lawr fel'na, does 'na'm point byw.
|
Lei
|
Dyna'r peth twpia dwi 'rioed 'di clywed. Ridiculous! Os fysa 'nghariad i'n cysgu efo dyn arall, faswn i'm yn lladd'n hun. Faswn i'n lladd hi. Gwell fyth, lladd y boi arall.
|
Shujun
|
Be os mae'r sarhad yn ormod?
|
Lei
|
Dal ddim yn gwneud sens. Fedrai'm dalld rywun sy'n llad ei hun dros wallau rywun arall. Chwinc yn ei ben!
|
Ping
|
Go iawn rŵan — bwyd, gwely, anghofio.
|
Shujun
|
Ond be os tisio anfon neges? I wneud nhw deimlo'n ddrwg. Fel merched y pentre 'cw sy'n lladd ei hunain i ddial ar eu mamau mewn cyfraith. I orfodi nhw i gydnabod y ffordd roedden nhw'n trin y merched.
|
Lei
|
Eh? Neith hynna byth weithio. Syniad boncyrs gan ferched yn byw ganol nunlle.
|
|
Lei yn rowlio ei lewys fyny. Mae craith ar ei fraich. Mae'r lliw yn binc golau.
|
Lei
|
Wnaeth fy ex drio hynna. Sawl blynedd yn ôl. Yn torri ei hun efo cyllell, torri mewn i artery. Wnes i drio agosàu, i roi pwysau ar yr anaf, a mi wthiodd y gyllell mewn i'm braich. Odd na lot o waed 'de, yn pwmpio allan, arllwys dros y lle i gyd yr holl ffordd i'r ysbyty. Ddaru hi fyw, ond o'dd o'n ufflon o noson.
|
Ping
|
Be ddigwyddodd wedyn?
|
Lei
|
Dodd 'na'm 'wedyn'. Pwy 'sa'n priodi merch fel'na?
|
Ping
|
'Di'n iawn rŵan?
|
Lei
|
(codi ei ysgwyddau) Heb siarad efo hi.
|
Shujun
|
Pam oedd hi'n trio lladd ei hun?
|
Lei
|
Oedd hi'm yn iawn yn ei meddwl nag o'dd. Neu ella oedd hi'n flin efo fi am rywbeth neu'i gilydd. Allai'm cofio.
|
Shujun
|
Ti'n teimlo'n euog?
|
Lei
|
Euog? Na'dw. Mae'r holl beth rhwngtha hi a'i photas.
|
Shujun
|
Felly dwyt ti ddim yn deall rheiny sy'n cynnau ei hunan ar dân fel protest gwleidyddol?
|
Lei
|
Wrth gwrs ddim.
|
|
Lei yn cymryd y botel.
|
Lei
|
Mae nhw 'di clirio'r ffordd i'w gelynion - 'di helpu nhw allan! Lle mae'r sens yn hynna? Pa bynnag sefyllfa, peidiwch a copio'r merched o'r pentre. Fydd y bobl dachi'n trio effeithio ddim yn teimlo'n ddrwg. Fydden nhw'n chwerthin ar eich pen chi. A fyddech chi ddim o gwmpas i chwerthin yn ôl arnyn nhw. Os dachi'n gofyn i mi, dial 'di'r unig ymateb call.
|
|
Lei yn rhoi'r botel yn ôl i'r bachgen. Distawrwydd.
|
Shujun
|
Ocê. Dyma gwestiwn i ti. Fysat ti'n marw er mwyn amddiffyn rywun ti'n caru?
|
Ping
|
Er enghraifft?
|
Shujun
|
I helpu dy deulu allan o broblemau ariannol. Neu i achub ffrind.
|
Ping
|
Eto, sut mae lladd eich hun yn helpu?
|
Shujun
|
Wel be os wyt ti'n credu mewn karma. Felly ti'n cymryd dy fywyd er mwyn atal cosbedigaeth i rywun ti'n garu.
|
|
Saib. Maent yn yfed.
|
Ping
|
Fedrai weld pam ti'n yfed ar ben dy hun, os mai dyma di'r math o banter ti'n roi allan yn y pub.
|
|
Maent yn yfed mwy.
|
Ping
|
'Ti bach yn ifanc i'r holl ofid a gwae 'ma dwyt?
|
Lei
|
Mae'n hwyr. Amser mynd adre dwi'n meddwl.
|
|
Mae'r bachgen yn nesàu at yml y to.
|
Shujun
|
Un cwestiwn olaf. Be os fedri di'm dioddef byw cam ymhellach achos bod y byd yn fucked up.
|
Ping
|
Os mae'r byd yn fucked up, dyna reswm da i fyw! I wneud pethe'n well. I roi pethe yn ei le.
|
Shujun
|
Dwn im. Pan oni'n blentyn, oni isio bod yn arwr. Yn cywiro camweddau. Sefyll fyny i'r system ar ran y llai ffodus. Fel lleidr penffordd, herwr o hogyn.
|
Ping
|
Finna 'fyd!
|
Shujun
|
Ti'n gweld y byd fel lle creulon?
|
Ping
|
Wrth gwrs. Sbia o gwmpas, cym' famma. Dani'n gweithio i'r bôn i adeiladu rhain, ond yn y diwedd, fedra ni'm eu cyffwrdd.
|
Lei
|
Fyswn i'm yn gadael ti'n agos i le fel hyn!
|
Ping
|
Fyswn i'm yn gadael tithau chwaith!
|
Lei
|
Ond ma hynna'n wir. Mae'r bobl sy'n deud celwyddion ac yn bihafio fel mynnan nhw fyw mewn palasau. Does 'na'm rheswm am y peth. Sbia ar y gerddi, y clybiau preifat!
|
Shujun
|
Does 'na'm tâl da i gael am waith caled yn y byd yma.
|
Ping
|
Gwaith caled sy'n cael ei dalu lleiaf.
|
Lei
|
Bod yn ddigywilydd ydi'r swydd gorau.
|
Shujun
|
Yn y dechrau, dim ond rhai sy'n gwneud pethe cywilyddus. Ag os dydyn nhw'm yn cael eu cosbi, yn hytrach - os mae nhw'n cael eu gwobreuo, dyna sut mae'n cychwyn. Mae pawb yn dilyn y system newydd. Hyd nod yn fy mhrifysgol, adeg etholiad llywydd undeb y myfyrwyr, mae pawb yn defnyddio perthnasoedd a presantau i brynu pleidleisiau.
|
Ping
|
Mae o fel'na ym mhob man. Echddoe roedd Yang yn deud, fy mos, bod y siawns o gael contract prosiect yn dibynnu yn llwyr ar swyddogion uchel. Os dydi Yang ddim yn chwarae eu gêm, fydd o allan yn y rownd gyntaf.
|
Lei
|
Dros ben llestri dydi. Mae angen i ni gael gwared ohona nhw i gyd a'u hanghyfiawnder.
|
Shujun
|
Mae'r byd yn anghyfiawn. John Lennon! John Lennon er enghraifft, sut fedrith o gael ei ladd?
|
Lei
|
Mae isio sortio'r lle ma allan. Lladd y rhai llygredig.
|
Shujun
|
Pam mae o mor anodd mynnu bod rywbeth yn digwydd?
|
Lei
|
Be?
|
Shujun
|
Pan oeddwn i'n fach, oni'n gobeithio dysgu Kung-Fu i helpu'r gwan a'r tlawd, a gwaredu'r byd o anghyfiawnder.
|
Ping
|
Finna' 'fyd!
|
Shujun
|
Wedyn oeddwn i isio bod yn fardd. Fel Lu Xun. "Gyda chalon ffyrnig, dwi'n herio yn dawel mil o fysedd sy'n cyhuddo, Plygu mhen fel ychen fodlon, dwi'n gwasanaethu'r plant."
|
Ping
|
Da rŵan.
|
Shujun
|
Roedd fy nhad yn arfer dweud mai'r peth mwya gwirion ydi gwario amser efo boblgyda diddordebau main, a hefyd bod angen bod bob amser yn ddyfal - mae camgymeriadaubach yn gallu difetha bywyd.
|
Lei
|
'Di hwn di meddwi ta be?
|
Shujun
|
'Y rheswm na fedr person gyffredin fod yn sant ydi'r dymuniadau angerddol sy'n ein arwain ymhobman.' … 'Roeddwn i'n meddwl dy fod yn arwr, ond mae'n ymddangos mai dyn cyffredin wyt' … 'Os na fedr person waredu syniadau sy'n llenwi'r meddwl a'i feichio'n barhaus, mi fydd o'n rwymedig â grymoedd cyferbyniol.'
|
Ping
|
Dwi'n cytuno. Ond b'un ofalus, nei di. Mae'n wyntog fyny famma.
|
Shujun
|
Sut allith o fod yn gymaint o hypocrite?
|
|
Mae'r bachgen yn symud ei draed at ochr eithaf y to.
|
Ping
|
Tyd o'r ymyl. Ti 'di meddwi. Dio'm yn sâff.
|
Shujun
|
Sut fedra i orfodi fo i weld ei gam?
|
Lei
|
Paid a bod yn ferthyr. Fyddi di'n difaru'n bora.
|
Shujun
|
Mae mor anodd cario 'mlaen fel hyn. Dwisio cerdded llwybr fy hunain. Dwi'n casau'r … bullshit 'ma!
|
|
Mae'r bachgen yn dechrau colli ei falans.
|
Ping
|
Hei!
|
|
Ping yn ei achub, gwthio nôl. Mae'r bachgen yn estyn am y botel fodca. Mae'n wag. Mae'n dechrau canu.
|
Shujun
|
Chwilio a chwilio a methu ffindio prawf bywyd strydoedd y ddinas rhy galed i adael olion traed Dim ond pan dwi'n gadael y dorf dwi'n medru ffindio'n hun yn anadlu yn rhydd awyr y môr.
|
Ping
|
Mae'r cân yna'n classic!
|
|
Ping yn ymuno. Lei yn hymian.
|
Ping
|
Deudodd be di'r ots am y clwyf bach hwn yn y storm Dagrau ond dim ofn, o leiaf mae gynnon freuddwydiau Deudodd be di'r ots am y clwyf bach hwn yn y storm
|
|
Ping yn canu yn uchel, ar daith emosiynol y gân. Mae'r gân yn dod i ben, y moment yn pasio. Lei yn gweld bod y bachgen wedi dechrau cysgu.
|
Lei
|
Hei.
|
|
Dim ymateb gan y bachgen. Lei yn codi'r botel wag. Edyrch ar Ping.
|
Lei
|
Odda ti'n bwriadu gwneud hynna?
|
Ping
|
Be?
|
|
Lei yn pwyntio at y bachgen yn cysgu.
|
Lei
|
Anfon o i'w drwmgwsg.
|
Ping
|
Wel, mae'n amlwg bod pŵer hudol yn fy llais. Ella dyna'n alwedigaeth, gyrfa newydd i mi.
|
Lei
|
Gyrfa fel paldareiwr.
|
Ping
|
Byd-enwog.
|
Lei
|
Ti di meddwi?
|
Ping
|
Dwi braidd yn chwil.
|
Lei
|
Finna' 'fyd.
|
|
Mae'n cael gwared o'r botel.
|
Lei
|
Reit, tyd 'laen.
|
Ping
|
Be am sleeping beauty?
|
Lei
|
Gad o yna. Fydda ni di hen adael cyn iddo ddeffro.
|
Ping
|
Ti'n meddwl odd o am neidio go iawn?
|
Lei
|
Na. Siarad siarad siarad. Dyna fyfyrwyr i ti. Mi ddeutha i ti hyn, fydd gynno fo goblyn o gur pen yn bora.
|
|
Ping yn cymryd un golwg olaf ar y bachgen yn cysgu.
|
Ping
|
Bechod drosta fo.
|
Lei
|
Awê!
|
|
Maent yn mynd i mewn drwy'r ffenest.
|