| |
|---|
Pobun
|
[Taeogion, pa beth fyddent i mi pe cymerwn hwy i'm canlyn—ni byddai hynny ond cymorth prin. (Gan edrych o'i gylch.) A yw'r wledd lawen drosodd a phawb wedi mynd o'r neuadd?]
|
|
[Mynd o hono at y bwrdd. Rhai o'r gwahoddedigion eto'n bwyta ac yfed, yn neidio ar eu traed wrth ei weled ac yn ffoi rhagddo. Sudda'r bwrdd o'r golwg i'r llawr.]
|
Pobun
|
Onid erys un cymorth arall i mi ynteu, ai un colledig ydwyf innau? Ac yn gwbl unig yn y byd, ai dyna fel y mae hi arnaf eisoes? [A barodd Ef eisoes fy mod yn noeth ac heb ddim gallu,] fel pe bawn eisoes yn gorwedd yn fy medd, a minnau a'm gwaed eto'n gynnes, fy nhaeogion eto'n ufudd i mi, a thai a thrysorau eto'n eiddo i mi? Hai! caned y clychau—-alarwm ynteu, chwithau daeogion, peidiwch ag ystelcian yn y tŷ, dowch allan ataf oll.
|
|
Daw'r goruchwyliwr ac eraill yn gyflym.
|
Pobun
|
Rhaid i mi fynd ar daith ar frys, a hynny nid mewn cerbyd ond ar droed. Doed fy holl weision gyda mi, dyger fy nghist arian yma, bydd y daith megis ymgyrch byddin, ac felly bydd yn rhaid i mi gael fy nhrysorau i'm canlyn.
|
Goruchwyliwr
|
Y gist drom sydd yn y fan draw?
|
Pobun
|
Ie, rhag blaen, heb lawer o siarad.
|
|
Daw gweision eraill, wyth ohonynt yn dwyn cist drom.
|
Pobun
|
Gelwais arnoch ar gyfer taith, a bydd raid i bob un fod yn ufudd i mi. Taith ddieithr a phell iawn fydd hi, yn gofyn am bobl ffyddlon; [rhaid cymryd y daith hon mewn distawrwydd llwyr, ac yr wyf yn ymddiried ynoch am hyn oll.]
|
Gwas 2
|
Dyma gist ddigon trom i ladd dyn.
|
Goruchwyliwr
|
Gwnewch y peth a baro'ch meistr i chwi.
|
Pobun
|
Yn awr, cychwynnwn i'r daith yn dawel iawn, heb yn wybod i neb.
|
|
Daw Angau i'r golwg draw.
|
Gwas 2
|
Dacw ddiawl yn sefyll ac yn arwyddo arnom aros.
|
Goruchwyliwr
|
Na, yr Angau ofnadwy yw. Dacw fo'n dyfod tuag atom yn ei rym a'i lid.
|
|
Y Gweision yn gollwng y gist ac yn ffoi a'r Goruchwyliwr i'w canlyn.
|
Angau
|
Ti ynfyd, buan yr aeth dy awr drosodd, ac ni ddysgaist tithau eto ddim doethineb. Ni wyddost sut i geisio cydymaith cymwys, a buan y byddi heb un gobaith ac yn dy felltithio dy hun.
|
|
Diflanna.
|